Na dékada 50 i 60, durante mas ku seis aña, Pader Brenneker i Elis Juliana a logra di kolektá mas ku 1400 kantika, músika i kuenta, historia di pueblo den dékada sinkuenta. Nan ta forma aworaki e alma di kultura di Korsou. 

Esaki nan a hasi ku nan propio forsa, sin medionan finansiero, ku masha dedikashon. Nan a kuminsá na Seru Fortuna pa sigui na otro lugánan na Korsou i Boneiru.  No tabata fásil pa reskatá un kantika di rema boto, planta maishi, kap palu, koba un pos, di aña nobo, di bati huda, di gruña, di koba pos, di pleizi, di yukan i ocho dia, di seú i simadan, sintá den un stul di zoya den kas o riba un banki pariba di kas? I hopi biaha e dos baluarte kultural mester a bai kas i bolbe bèk despues ora machi o pachi su kurpa tin mas grasia. 

Den dékada 70, despues di 30 di Mei, un grupo di hóben progresivo (i rebelde), entre nan Angel Salsbach, a haña e idea di traha un proyekto di e herensia balioso aki.

Esei tabata ora e profesor Paul Hair, un merikano, ku a bin Korsou pa yuda e hóbennan. Tabata un inisiativa di Norman Chumaceiro.   

Angel Salsbach a aserka Pader Brenneker i Elis Juliana pa por archivá i kuida e material, pone ku e material lo sirbi komo base di estudio kultural i desaroyo musikal di nos komunidat. Brenneker a pone komo kondishon ku mester lanta un Fundashon. Asina a lanta 25 di mart 1974 e Fundashon ku Etzel Provence di presidente.  Otro personanan den direktiva ta Oswald Specht, Johannes ‘Suhandy’ Oosterhof, Virginia ‘Poppy’ Bogaard- Muzo, Ramon Penzo i Paul  Brenneker mes.  A haña sosten di dr. Rene Romer i Minister Boy Roozendal.

Na febrüari 1975 Fundashon Zíkinza a logra di habri un sentro di dokumentashon na Archivo Nashonal ku tabata na St. Thomas college na Otrobanda.  A publiká un katálogo, Kontenido di Zíkinza, i señor  Oosterhof  a pasa e material riba reel to reel bou di e nòmber Publicidad Antiyano.  E Belgo Jos Gansemans a traha den dékada 90 riba un otro kopia di kalidat.

E  materialnan akí a sirbi hopi aña largu pa studia, haña inspirashon o traha un tésis, un presentashon, pa kanta tumba i pa musikólogo. Riba petishon a duna un kopia na AAINA, i tin un kopia na Biblioteka Públiko, kaminda sr. Rubens a traha un kopia. E kolekshon di AAINA a bai Archivo Nashonal na 1997. Na Archivo Nashonal a traha riba un lista digital di e  kontenido.                                                                                                                                

Aña pasa Angel Salsbach a aserka direktor di NAAM, Inchi Witteveen, ku e solisitut pa risibí e material original.  Esei a pasa, den presensia di entre otro miembronan di Fundashon Zikinza, Pam pa Mi Ruman, Elis Juliana mes.

Pa NAAM ta un honor pa risibí a  e tesoro iremplasabel aki ku tin enorme kantidat di dato di historia oral. Ta enfatisá ku e material aki ta un antologia (‘bloemlezing’) di e kolekshon Brenneker/Juliana. Por bisa ku ta e alma di herensia kultural di Korsou.

E ta  komplementá e herensia material kultural di Brenneker i Juliana ku a pasa ofisialmente pa Fundashon NAAM na yüli 2001, di kua tambe ta keda ekshibí den diferente museo na Kòrsou i na e eksposishon aktual Altá di Korsou. 

Ku e material aki por sigui traha i profundisá e tareanan prinsipal di NAAM: konserva i enrikesé e memoria kolektivo di nos komunidat.